“ ମାଆ ” ମାତୃ ଦିବସ ଉପଲକ୍ଷେ ସ୍ୱତନ୍ତ୍ର କବିତା

ମତେ ପୃଥିବୀକୁ ଆଣିବାରେ
ମୋ ଦେଖିବାରେ, ଶୁଣିବାରେ
ମୋ କହିବାରେ, ସହିବାରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l୦l

ମୋ ଆଖିରେ ଦେଖିଲେ ଲୁହ
ଶୁଖି ଯାଏ ତାର ମୁହଁ
ମୋ ଓଠରେ ନଥିଲେ ହସ
କରଇ ଶହେ ଜିଜ୍ଞାସ
ମୋ ହସିବାରେ, ମିଶିବାରେ
ମୋ ଶୋଇବାରେ, ଉଠିବାରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l ୧ l

ମୋ ଦିହରେ ଖଣ୍ଡିଆ ହେଲେ
ଲଗାଏ ପଟି ପହିଲେ
କେବେ ସାରା ରାତି ନିଜେ ଚେଇଁ
ଦିଏ ସେ ମତେ ଶୁଆଇ
ମୋ ଲେଖିବାରେ, ପଢିବାରେ
ମୋ ଭାବିବାରେ, ବୁଝିବାରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l ୨ l

ମୋ ଚେହେରାକୁ ଚାହିଁ ଯିଏ
ମନ କଥା ବୁଝି ଯାଏ
ମୋ ନୀରବତାର କାରଣ
(ଖୋଜି) ପାଇବାରେ ବିଚକ୍ଷଣ
ମୋ ଖେଳିବାରେ, ବୁଲିବାରେ
ମୋ ଗପିବାରେ, ଗାଇବାରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l ୩ l

ମୋ ପାଇଁକି ମାଆ ପଣତ
ସ୍ୱର୍ଗଠୁ ବଳି ସମ୍ପଦ
ତା ହାତ ଥିଲେ ମୋ ମଥାରେ
(ମୁଁ ) ଦୁନିଆକୁ ଜିଣିପାରେ
ମୋ ମନନରେ, ମନୀଷାରେ
ମୋ ଧରିବାରେ, ଛାଡିବାରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l ୪ l

ମୋ ମାଆର କାହିଁ ତୁଳନା !
(ତା )ଋଣର ନାହିଁ କଳନା
ମୁଁ ଜନ୍ମ ପରେ ଜନ୍ମ ନେଇ
ଆସିବି ଶୁଝିବା ପାଇଁ
ମୋ ଉତ୍ସାହରେ, ଆବେଗରେ
ମୋ ଅସ୍ମିତାରେ, ଆଭୋଗରେ
ସବୁଠୁ ବେଶୀ ଅବଦାନ ଯଦି ଥାଏ କାହାର !
ମାଆ… ମାଆ… ମାଆ
କେବଳ ଗୋଟିଏ ଉତ୍ତର l ୫ l

କବି- ସୌମ୍ୟେନ୍ଦ୍ର ମିଶ୍ର

ଗଣିତ ଅଧ୍ୟାପକ,
ନୂଆ ଶାସନ, ଢେଙ୍କାନାଳ ।।

ମୋ ସାହିତ୍ୟ

ମୋ ଢେଙ୍କାନାଳ