ସଦର ବ୍ଲକ୍ ଅନ୍ତର୍ଗତ ଭାପୁରସ୍ଥିତ ଦେବେନ୍ଦ୍ର ଶତପଥୀ ମେମୋରିଆଲ୍ କଲେଜ୍ଠାରେ ବିଶ୍ୱ ତାଇକୋଣ୍ଡ ଦିବସ ଉପଲକ୍ଷେ ଆମେଚର୍ ତାଇକୋଣ୍ଡୋ ଓ ଗୁରୁଦେବଜୀ ମାର୍ଶାଲ୍ ଆର୍ଟ ପକ୍ଷରୁ “ମିଶନ ସୁରକ୍ଷା ” କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି ।
ଏହି କାର୍ଯ୍ୟକ୍ରମରେ କଲେଜ୍ର ପ୍ରାୟ ୧୫୦ରୁ ଉର୍ଦ୍ଧ୍ୱ ଛାତ୍ରୀମାନଙ୍କୁ କରୋନା କଟକଣାରେ ଆତ୍ମରକ୍ଷା କୌଶଳ ଶିକ୍ଷା ପ୍ରଦାନ କରାଯିବା ସହିତ ଏକାଡେମୀ ପକ୍ଷରୁ ବିଭିନ୍ନ କଳାକୌଶଳ ପ୍ରଦର୍ଶନ କରାଯାଇଥିଲା । ଅନୁଷ୍ଠାନର ପ୍ରତିଷ୍ଠାତା ତଥା ସମ୍ପାଦକ ଇଂ.ସୌମ୍ୟବ୍ରତ ସାହୁ ଏହି କାର୍ଯ୍ୟକ୍ରମରେ ମୁଖ୍ୟ ପ୍ରଶିକ୍ଷକ ଭାବେ କୌଶଳ ଶିଖାଇବା ସହ ଆତ୍ମ ବିଶ୍ୱାସ ହିଁ ଆତ୍ମ ରକ୍ଷା ବୋଲି ମତପ୍ରକାଶ କରିଥିଲେ ।
ଏହି ଦିବସରେ କଲେଜ୍ର ଅଧ୍ୟକ୍ଷ ଚନ୍ଦ୍ରଶେଖର ପଣ୍ଡା ଉପସ୍ଥିତ ରହି କାର୍ଯ୍ୟକ୍ରମର ଉପକାରିତା ଓ କୌଶଳକୁ ଅନୁଭବ କରି ଅନୁଷ୍ଠାନର ଏହିଭଳି ସମାଜ କଲ୍ୟାଣ କାର୍ଯ୍ୟ ପାଇଁ ଭୂୟସୀ ପ୍ରଶଂସା କରିବା ସହ ଆମ କଲେଜ୍ରେ ଆୟୋଜନ କରିଥିବାରୁ ଶ୍ରୀ ସାହୁଙ୍କୁ ଧନ୍ୟବାଦ ଜଣାଇଥିଲେ ।
ଉକ୍ତ କାର୍ଯ୍ୟକ୍ରମରେ ଅନୁଷ୍ଠାନର ବରିଷ୍ଠ ସଦସ୍ୟ ଶୁଭ ପ୍ରସାଦ ପଣ୍ଡା ଯୋଗଦେଇ ତାଇକୋଣ୍ଡୋର ଗୁରୁତ୍ୱ ଉପରେ ଛାତ୍ରୀମାନଙ୍କୁ ଜଣାଇବା ସହିତ ଉତ୍ସାହିତ କରିଥିଲେ । ଏହି କାର୍ଯ୍ୟକ୍ରମରେ ପ୍ରଶିକ୍ଷକ ଡାର୍ଲିନ୍ ଡାଲ୍ଟନ୍, ଇନ୍ଦ୍ରଜିତ୍ ସାହୁ, ପ୍ରତାପ ନାୟକ, ମିଶନ ସୁରକ୍ଷାର ସଦସ୍ୟା ମୋହିନୀ ମୋନାଲିସା, ଛାତ୍ରୀ ଯାଜ୍ଞଶ୍ରୀ ଶତପଥୀ ପ୍ରମୁଖ ଉପସ୍ତିତ ରହି ସହଯୋଗ କରିଥିଲେ ।
ବ୍ୟୁରୋ ରିପୋର୍ଟ ମୋ ଢେଙ୍କାନାଳ
