ଆରକ୍ଷୀ ଅଧିକ୍ଷକ କେ. ଶିବା ସୁବ୍ରମଣିଙ୍କ ବିଦାୟ ପରେ ଢେଙ୍କାନାଳ ଜିଲ୍ଲାରେ ନୂତନ ଆରକ୍ଷୀ ଅଧିକ୍ଷକ ଭାବେ ଲୋଗାନୟାଗୀ ଦିବ୍ୟା ଭି ଆଜି ନିଜ କାର୍ଯ୍ୟରେ ଯୋଗଦେଇଛନ୍ତି । ଶ୍ରୀମତୀ ଦିବ୍ୟା ଭି ୨୦୧୩ ମସିହାର ଆଇପିଏସ ଅଟନ୍ତି । ସେ ଏହାପୂର୍ବରୁ ଓଡିଶା କ୍ରାଇମବ୍ରାଞ୍ଚର ଏସପି ଭାବେ କାର୍ଯ୍ୟରତ ଥିଲେ ।
ଜଣେ ଦକ୍ଷ ମହିଳା ପୁଲିସ ଅଧିକାରୀଙ୍କ ଭାବେ ଶ୍ରୀମତୀ ଦିବ୍ୟା ଭିଙ୍କ ସୁନାମ ରହିଛି । ଆଜି ପୂର୍ବାହ୍ନରେ ସେ ଢେଙ୍କାନାଳ ପୁଲିସ ମୁଖ୍ୟାଳୟରେ ଯୋଗଦେବା ପରେ ତାଙ୍କୁ ସେଠାରେ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ପୂର୍ବରୁ ଢେଙ୍କାନାଳ ଜିଲ୍ଲାରେ ଆଇପିଏସ ସନ୍ତୋଷ ବାଲା ଓ ଅନୁପମା ଜେମ୍ସଙ୍କ ପରେ ଶ୍ରୀମତୀ ଦିବ୍ୟା ଭି ହେଉଛନ୍ତି ତୃତୀୟ ମହିଳା ଏସପି । ଆଗାମୀ ଦିନରେ ଢେଙ୍କାନାଳରେ ଟ୍ରାଫିକ ସମସ୍ୟା ଓ ଆଇନଶୃଙ୍ଖଳା ପରିସ୍ଥିତିକୁ ସୁଧାରିବା ସହିତ ବେଆଇନ ବ୍ରାଉନସୁଗାର କାରବାରକୁ ରୋକିବା ପାଇଁ ସେ କାମ କରିବେ ବୋଲି ନିଜ ପ୍ରତିକ୍ରିୟାରେ ପ୍ରକାଶ କରିଛନ୍ତି ।
ବ୍ୟୁରୋ ରିପୋର୍ଟ ମୋ ଢେଙ୍କାନାଳ
